Referat frå møte i prosjektgruppa
Fredag den 8. mars klokka 10.00 i NSG sine lokalar i Parkveien 71.

Dette var det fyrste møtet der prosjektgruppa var samla. Tidlegare har vi hatt telefonmøte. To av medlemmene i gruppa var med via telefon. Dette fungerte brukbart.
Møtet vart halde i fine lokale i Parkveien, og vertskapet var framifrå.

-Nokre få oppsummeringar: 24 mjølkeprodusentar er no med. 4 av dei ventar til neste år. 16 veterinærar og 7 rådgjevarar er med i prosjektet. 530 prøver for CAEV er undersøkte i år, ca 1550 i fjor. Vi har fått svar frå 3 buskapar for byllesjuke og to for paratuberkulose, alle negative. Ein buskap har hatt problem med anemi etter kuråmjølk.
-NSG si rolle i saneringsprosessen vart diskutert, avl i sanerte buskapar og om det generelle avlsopplegget framover. Inntrykket er at geitebøndene er godt informerte om prosjektet. Sau og Geit er ope for informasjon og har alt hatt fleire artiklar som informerer om det. NSG vil gjerne ha eit bukkeringsystem framleis, men det må bli restriksjonar på å føre dyr frå bukkering til bukkering.
-Forslag til ny organisering av prosjektet vart drøfta. Det er oppretta lokal gruppe i nord og dei har hatt sitt fyrste telefonmøte. Det er mange spørsmål frå produsentane og det viser at slike grupper må opprettast også i sør.

-Saneringsprosessen er i gang mange stader og det er ofte vanskeleg å få tak i nok hokje. Men det er meldt om gode resultat fleire stader. Det er ein vanskeleg jobb som krev god oversikt og godt ettersyn. Det er ikkje tid til pauser, så ein lyt ha ordna seg med vakt. To studentar som har vore med ei veke har gjort ein god jobb, nokon har skaffa seg praktikant, men vi må prøve å rekruttere fleire studentar.
Det er ein føresetnad at det er interesserte veterinærar i området.
-Den totale budsjettramma er no på 10 492 615 kroner. Tine vil gje 470 000 pr år framover for å få budsjettet til å gå opp. Vi må halda oss innanfor dei rammene vi no har fått. Dette er signala som kjem frå landbruksdepartementet. Det betyr at det ikkje er plass til fleire i prosjektet no. Vi må hugse på å registrere eigeninnsats. Denne kan vera betydeleg utan at den kjem fram nokon stad. Dette må alle hugse på.
-Laboratoriedelen er no i god gjenge. Det har vore innkøyring ei stund, men no tek alle prøvene til å koma ut etter kvart. Det er laga eit system med merking av prøvene som går til Molde, slik at vi kan gå inn og sjå kva fase i prosjektet den er teken i. Dette merkesystemet ligg ved. Det er også utarbeidd eige rekvisisjonsskjema til bruk ved innsending av prøver. Laboratoriet sender også ut lappar til merking av prøveglas med der dei har trykt på produsentnummer. Alt dette gjeld Molde. Veterinærinstituttet bruker standard anamneseskjema.

Ei oppsummering av konklusjonar og vedtak.

1. Vi må få til eit praktisk opplegg for avl og semin i kvar saneringsbuskap. Kostnad til semin ligg ikkje inne prosjektet.
2. Vi kan bruke fersk sæd fyrste året av saneringsprosessen, ikkje frosen. Dette er mogeleg i Troms og kanskje ved uttak på Hallsteingård dersom dei får til ei ny fortynningsvæske slik at sæden kan tola lagring lenger enn i dag.
3. Vi kan tillate at snapping føregår over to år. Vi må fyrst gå inn og godkjenne opplegget for det andre året.
4. Det må sendast skriftleg søknad ved ynskje om avvik frå det offisielle opplegget.
5. Vi kan godta inntil 25% forskot pr år når det er dokumentert behov, og vi har pengar i prosjektet på det aktuelle tidspunktet.
6. Det er behov for hjelp til snapping. Vi må kontakte NVH og NLH for å få tak i studentar til hjelp til snapping.
7. Bonden er sjølv ansvarleg for smittevernet i fjøset sitt.
8. Dersom kje skal overførast til ny buskap i samband med snapping må det søkjast skriftleg om dette.
9. Vi må laga oppskrift på fôring av kje fram til avvenning.
10. Det må opprettast ei lokal styringsgruppe også i sør.
11. All eigeninnsats må registrerast.
12. Alle må få del i spørsmål og svar.
13. Det skal opprettast redaksjonskomité på tre medlemmer som skal passe på at informasjonen kjem ut til alle involverte partar.
14. Databasen i Molde skal vurderast av programmeringskunnig person med tanke på databaseprogram for prosjektleiar.
15. Fagseminar er planlagt i Valdres den 4-5 september. Komité er: Knut E. Grindaker, Solfrid Steen, Ola Nyberg, Prosjektleiar.
16. Neste møte for den sentrale prosjektgruppa blir bestemt når den lokale gruppa i sør er etablert og har hatt sitt fyrste møte.